ບໍລິສັດ ສຸກໃຈ ບໍລິການຈັດຫາງານ ພວກເຮົາຈະເປີດຮັບສະໝັກໄປເຮັດວຽກຢູ່ປະເທດຢີ່ປຸ່ນ ກໍຕໍ່ເມື່ອມີການແຈ້ງເອກະສານໂຄຕ້າ ທີ່ເປັນທາງການມາຈາກທາງສະມາຄົມຍີ່ປຸ່ນເທົ່ານັ້ນ ໂດຍມີຂັ້ນຕອນການດຳເນີນງານທີ່ໂປ່ງໃສດັ່ງນີ້:

✅ ໄລຍະທີ 1: ການຮັບສະໝັກ ແລະ ຄັດເລືອກ

ການຄັດເລືອກແຮງງານຈະແບ່ງອອກເປັນ 2 ຮູບແບບ ຕາມຄວາມຕ້ອງການຂອງສະມາຄົມຍີ່ປຸ່ນດັ່ງນີ້:

1. ຮູບແບບທີ 1: ບໍລິສັດສຳພາດເບື້ອງຕົ້ນແລ້ວສົ່ງຂໍ້ມູນ-ປະຫວັດຂອງແຮງງານໄປໃຫ້ທາງສະມາຄົມຍີ່ປຸ່ນເປັນຜູ້ຄັດເລືອກ.

2. ຮູບແບບທີ 2: ບໍລິສັດສຳພາດເບື້ອງຕົ້ນຈາກນັ້ນນັດໝາຍວັນເພື່ອໃຫ້ທາງສະມາຄົມຍີ່ປຸ່ນເດີນທາງມາສຳພາດແຮງງານດ້ວຍຕົນເອງ.

ໝາຍເຫດ: ສຳລັບຮູບແບບທີ 2 ກ່ອນການສໍາພາດ ແຮງງານຈະຕ້ອງໄດ້ ຈ່າຍເງິນມັດຈຳລ່ວງໜ້າ 100 ໂດລາ ເພື່ອເປັນການຢັ້ງຢືນສິດ ແລະ ຮັບປະກັນວ່າຈະມາສຳພາດຕາມວັນເວລາທີ່ນັດໝາຍ ເມື່ອສິ້ນສຸດການສຳພາດແລ້ວ ທາງບໍລິສັດຈະສົ່ງເງິນມັດຈໍາຄືນໃຫ້ ໃນກໍລະນີທີ່ແຮງງານມາສຳພາດຕາມກໍານົດ.

✅ ໄລຍະທີ 2: ການກວດສຸຂະພາບ ແລະ ການຝຶກອົບຮົມ

1. ກວດສຸຂະພາບ: ເມື່ອທາງສະມາຄົມຍີ່ປຸ່ນຄັດເລືອກແຮງງານແລ້ວ, ແຮງງານຕ້ອງກວດສຸຂະພາບ ຫາກຜ່ານຕາມເງື່ອນໄຂ ກໍຈະໄດ້ເຂົ້າຮຽນພາສາເພື່ອກະກຽມໃນການເດີນທາງໄປເຮັດວຽກຢູ່ຍີ່ປຸ່ນ.

2. ໄລຍະການຮຽນພາສາ: ແຮງງານຈະຕ້ອງເຂົ້າຮຽນພາສາ ແລະ ວັດທະນະທຳຂອງປະເທດຢີ່ປຸ່ນ ເປັນເວລາ 3-6 ເດືອນ ເພື່ອລໍຖ້າໃບຮັບຮອງສະຖານະພາບການພຳນັກ (COE) ຈາກຍີ່ປຸ່ນ. ພາຍຫຼັງຮຽນຈົບທິດທຳອິດ ບໍລິສັດຈະມີການສອບຖາມຄວາມສະໝັກໃຈ ແລະ ຄວາມຕັ້ງໃຈຂອງແຮງງານອີກຄັ້ງໜຶ່ງ ວ່າແຮງງານຍັງຕ້ອງການໄປເຮັດວຽກຢູ່ຍີ່ປຸ່ນແທ້ຫຼືບໍ່ ດ້ວຍຄວາມສະໝັກໃຈ.

3. ຫາກແຮງງານຢັ້ງຢືນຄວາມພ້ອມ ແລະ ຄວາມສະໝັກໃຈ ບໍລິສັດຈະນັດຜູ້ຄ້ຳປະກັນເຂົ້າມາມີສ່ວນຮ່ວມໃນການເຊັນສັນຍາ ແລະ ຮັບຮູ້ເງື່ອນໄຂຕ່າງໆກ່ອນການເດີນທາງ ສັນຍາທີ່ຕ້ອງເຊັນມີ 2 ປະເພດເຊັ່ນ:

- ເຊັນສັນຍາລະຫວ່າງ ແຮງງານ ແລະ ບໍລິສັດຈັດສົ່ງ
- ເຊັນສັນຍາຈ້າງງານ ແຮງງານ ແລະ ຍີ່ປຸ່ນ.

ໃນຂັ້ນຕອນນີ້ຈະມີຄ່າໃຊ້ຈ່າຍທີ່ຕ້ອງຊໍາລະດັ່ງນີ້:

1. ຄ່າຮຽນ ແລະ ຄ່າປຶ້ມແບບຮຽນ: 1,200,000 ກີບ.
2. ເງິນຄໍ້າປະກັນກ່ອນການເດີນທາງ: 20,000,000 ກີບ (ເງິນຄ້ຳປະກັນນີ້ຈະໄດ້ຄືນກໍຕໍ່ເມື່ອເຮັດວຽກຄົບສັນຍາ 3 ປີ ເທົ່ານັ້ນ).

✅ ໄລຍະທີ 3: ການກຽມວີຊາ ແລະ ຄ່າທຳນຽມການເດີນທາງ

1. ການຍື່ນວີຊາ: ເມື່ອໃບ COE ຈາກຍີ່ປຸ່ນອອກແລ້ວ, ບໍລິສັດຈະນຳເອກະສານໄປຍື່ນຂໍວີຊາທີ່ສະຖານທູດຍີ່ປຸ່ນ ປະຈຳລາວ (ໃຊ້ເວລາຢັ້ງຢືນປະມານ 1 ອາທິດ).

2. ຄ່າທຳນຽມການເດີນທາງ: ໃນຊ່ວງລໍຖ້າວີຊາ, ແຮງງານຈະຕ້ອງຊຳລະຄ່າທຳນຽມການເດີນທາງຈຳນວນ 2,500 ໂດລາ. ກໍລະນີທີ່ແຮງງານບໍ່ມີເງິນກ້ອນທີ່ຈະຊໍາລະດ້ວຍຕົນເອງ ແຮງງານສາມາດກູ້ຢືມນໍາບໍລິສັດໄດ້ ໂດຍການນຳໃຊ້ໃບຕາດິນເປັນຫຼັກຊັບຄ້ຳປະກັນ

3. ກຳນົດມື້ເດີນທາງ: ບໍລິສັດຈະປະສານງານກັບສະມາຄົມທາງຍີ່ປຸ່ນ ແລະ ແຈ້ງໃຫ້ແຮງງານຊາບ ເພື່ອໃຫ້ແຮງງານໄດ້ວາງແຜນ, ຕັດສິນໃຈເລືອກມື້ເດີນທາງ ແລະ ກະກຽມຄວາມພ້ອມ.

✅ ໄລຍະທີ 4: ມື້ເດີນທາງ ແລະ ການເຮັດວຽກຢູ່ຍີ່ປຸ່ນ

1. ບໍລິສັດຈະນັດແຮງງານຢູ່ສະໜາມບິນ ເພື່ອອະທິບາຍຂໍ້ຄວນຮູ້-ຂໍ້ຄວນລະວັງໃນການເດີນທາງ

2. ຕະຫຼອດໄລຍະເວລາທີ່ເຮັດວຽກຢູ່ຍີ່ປຸ່ນ ຫາກແຮງງານພົບເຈີບັນຫາ ບໍ່ວ່າຈະເປັນເລື່ອງສະພາບແວດລ້ອມ, ການເຈັບປ່ວຍ ຫຼື ມີຂໍ້ຂັດແຍ່ງກັບນາຍຈ້າງ ທາງບໍລິສັດມີຜູ້ປະສານງານ ໃຫ້ຄຳແນະນຳ ແລະ ໃຫ້ຄວາມຊ່ວຍເຫຼືອ

3. ເມື່ອແຮງງານເຮັດວຽກຄົບ 1 ປີ ແລະ ສາມາດຊຳລະໜີ້ສິນ ທີ່ກູ້ຢືມໄປ 2,500 ໂດລາ ຄົບຖ້ວນຮຽບຮ້ອຍແລ້ວ, ສາມາດໃຫ້ຄອບຄົວມາຕິດຕໍ່ຂໍຮັບຫຼັກຊັບຄ້ຳປະກັນ (ໃບຕາດິນ) ຄືນໄດ້ທັນທີໂດຍບໍ່ຕ້ອງລໍຖ້າໃຫ້ຄົບ 3 ປີ.

✅ ໄລຍະສິ້ນສຸດສັນຍາ ແລະ ເດີນທາງກັບຄືນ ສປປ ລາວ

1. ເມື່ອແຮງງານເຮັດວຽກຄົບກໍານົດສັນຍາ 3 ປີ ແຮງງານຈະໄດ້ຮັບເງິນຄ້ຳປະກັນຈຳນວນ 20,000,000 ກີບ ຄືນຈາກບໍລິສັດ.

2. ສຳລັບແຮງງານທີ່ໄດ້ຈ່າຍເງິນສະສົມບຳນານຢູ່ຍີ່ປຸ່ນຢ່າງຖືກຕ້ອງເປັນປະຈຳ, ເມື່ອເດີນທາງກັບມາຮອດປະເທດລາວແລ້ວ, ທາງບໍລິສັດຈະຊ່ວຍດຳເນີນເອກະສານແລ່ນຂໍຄືນເງິນບຳນານຄືນໃຫ້.