ດ້ວຍວິໄສທັດອັນກວ້າງໄກ ແລະ ເປົ້າໝາຍສູງສຸດ ໃນການຍົກລະດັບຄຸນນະພາບຊີວິດການເປັນຢູ່ຂອງປະຊາຊົນລາວໃຫ້ດີຂຶ້ນ. ຜູ້ບໍລິຫານ ກຸ່ມບໍລິສັດ ສຸກໃຈ ມຸ່ງໝັ້ນທີ່ຈະສ້າງອົງກອນໃຫ້ກາຍເປັນກຳລັງສຳຄັນ ໃນການຂັບເຄື່ອນເສດຖະກິດ ແລະ ພັດທະນາປະເທດຊາດໃຫ້ຈະເລີນກ້າວໜ້າ ໂດຍການສ້າງໂອກາດ ພ້ອມທັງຍົກລະດັບແຮງງານລາວໃຫ້ມີທັກສະ, ຄຸນນະພາບ ແລະ ສັກກະຍະພາບທຽບເທົ່າລະດັບສາກົນ ຄຽງຄູ່ໄປກັບການຕອບແທນຄືນສູ່ສັງຄົມ, ຄູ່ຮ່ວມງານ ແລະ ລູກຄ້າທຸກທ່ານ ເພື່ອກ້າວໄປສູ່ຄວາມສໍາເລັດພ້ອມກັນຢ່າງຍືນຍົງ.

ທ່ານ ນາງ ສິນໃຈ ໄຊຍະລາດ ປະທານກຸ່ມບໍລິສັດ ສຸກໃຈ ສຳເລັດການສຶກສາຈາກ ມະຫາວິທະຍາໄລພັດທະນາສີມືແຮງງານ ແຫ່ງປະເທດຍີ່ປຸ່ນ. ດ້ວຍບົດຮຽນທີ່ໄດ້ຮຽນຮູ້ ແລະ ປະສົບການ ຈາກການສຶກສາລົງເລິກກ່ຽວກັບລະບົບການສົ່ງເສີມ, ການຝຶກອົບຮົມວິຊາຊີບ ຕະຫຼອດຮອດການພັດທະນາສີມືແຮງງານຢ່າງເລິກເຊິ່ງຢູ່ຕ່າງປະເທດ ຈຶ່ງມີຄວາມມຸ້ງຫວັງຕັ້ງໃຈຢ່າງສູງສຸດ ທີ່ຈະນຳເອົາບົດຮຽນ ແລະ ປະສົບການທີ່ມີມາດຕະຖານລະດັບສາກົນດັ່ງກ່າວ ກັບຄືນມາສູ່ມາຕຸພູມທີ່ແສນຮັກ ເພື່ອສືບຕໍ່ພັດທະນາຊັບພະຍາກອນມະນຸດຂອງຊາດ ໃຫ້ທຽບເທົ່າກັບສາກົນເທື່ອລະກ້າວ.

ດ້ວຍອຸດົມການດັ່ງກ່າວ ໃນປີ 2019, ບໍລິສັດ ສຸກໃຈ ບໍລິການຈັດຫາງານ ຈຳກັດຜູ້ດຽວ ຈຶ່ງໄດ້ຖືກສ້າງຕັ້ງຂຶ້ນ ພາຍໃຕ້ການຊີ້ນຳຈາກ ກະຊວງແຮງງານ ແລະ ສະຫວັດດີການສັງຄົມ ເພື່ອເຄື່ອນໄຫວທຸລະກິດດ້ານການຈັດຫາງານ ທັງພາຍໃນ ແລະ ຕ່າງປະເທດ ຢ່າງເປັນທາງການ. ແຮງບັນດານໃຈ ແລະ ເປົ້າໝາຍໃນການສ້າງຕັ້ງ ບໍລິສັດ ສຸກໃຈ ບໍລິການຈັດຫາງານ ແມ່ນເພື່ອການສ້າງຂົວຕໍ່ອາຊີບ ເພື່ອໃຫ້ຄົນລາວໂດຍສະເພາະແມ່ນແຮງງານທີ່ບໍ່ມີວິຊາຊີບທີ່ຢູ່ເຂດຫ່າງໄກສອກຫຼີກ ໄດ້ຮັບໂອກາດ ສາມາດເຂົ້າເຖິງຕໍາແໜ່ງງານທີ່ມີຄຸນນະພາບ ທັງພາຍໃນ ແລະ ຕ່າງປະເທດ ຢ່າງຖືກຕ້ອງຕາມກົດໝາຍ. ນອກຈາກນີ້ຍັງເພື່ອຍົກສູງຄຸນນະພາບຊີວິດການເປັນຢູ່ຂອງແຮງງານ ແລະ ຄອບຄົວເຂົາເຈົ້າໃຫ້ນັບມື້ນັບດີຂື້ນ ເພາະການພັດທະນາສີມືແຮງງານ ບໍ່ພຽງແຕ່ສ້າງລາຍຮັບທີ່ດີ ແລະ ເປີດໂລກະທັດໃຫ້ກວ້າງຂຶ້ນເທົ່ານັ້ນ ແຕ່ຍັງສາມາດຖອດຖອນບົດຮຽນ ແລະ ທັກສະຕ່າງໆ ເພື່ອນຳກັບມາພັດທະນາປະເທດຊາດໃນອະນາຄົດ ທັງເປັນການສົ່ງເສີມນະໂຍບາຍຂອງພັກ ແລະ ລັດຖະບານ ໃນການນຳເງິນຕາຕ່າງປະເທດເຂົ້າສູ່ ສປປ ລາວ ແບບຖືກຕ້ອງຕາມກົດໝາຍ.

ເພື່ອຮອງຮັບ ແລະ ຂັບເຄື່ອນວິໄສທັດໃຫ້ເປັນຮູບປະທຳແບບຄົບວົງຈອນ ຜູ້ບໍລິຫານ ກຸ່ມບໍລິສັດ ສຸກໃຈ ຈຶ່ງໄດ້ວາງນະໂຍບາຍເພື່ອຄຸ້ມຄອງ ແລະ ສະໜັບສະໜູນປະຊາຊົນລາວໃຫ້ຄົບວົງຈອນໃນທຸກໆດ້ານເຊັ່ນ:

1. ສ້າງຕັ້ງ ສູນພັດທະນາສີມືແຮງງານ ສຸກໃຈ ເພື່ອເປັນສູນຝຶກອົບຮົມ ແລະ ຍົກລະດັບທັກສະສີມືແຮງງານລາວ ໃຫ້ມີຄວາມສາມາດ ແລະ ມີມາດຕະຖານຄຸນນະພາບສູງ ທຽບເທົ່າລະດັບສາກົນ.

2. ສ້າງຕັ້ງ ບໍລິສັດ ສຸກໃຈ ພັດທະນາກະສິກຳ ແລະ ການຄ້າ ເພື່ອສົ່ງເສີມ, ພັດທະນາ ແລະ ຂະຫຍາຍໂອກາດທາງດ້ານກະສິກຳ ແລະ ທຸລະກິດການຄ້າ ເພື່ອສ້າງຮາກຖານເສດຖະກິດໃນເຂດຊຸມຊົນ.

3. ສ້າງຕັ້ງ ສະຖາບັນການເງິນຈຸລະພາກທີ່ບໍ່ຮັບເງິນຝາກ ສຸກໃຈ ເພື່ອໃຫ້ບໍລິການແຫຼ່ງທຶນສິນເຊື່ອດອກເບ້ຍຕ່ຳ ເພື່ອແກ້ໄຂບັນຫາແຮງງານທີ່ຂາດເຂີນດ້ານທຶນຮອນ ໃຫ້ສາມາດເດີນທາງໄປເຮັດວຽກຢູ່ຕ່າງປະເທດໄດ້ຢ່າງສະດວກ ແລະ ປອດໄພ.

4. ສ້າງຕັ້ງ ສູນສົ່ງເສີມການສຶກສາ ສຸກໃຈ ເພື່ອສົ່ງເສີມ ແລະ ມອບໂອກາດໃຫ້ກັບນັກສຶກສາລະດັບມະຫາວິທະຍາໄລ (ປີ 2 ແລະ ປີ 3) ໄດ້ໄປຝຶກງານໄລຍະສັ້ນກັບບໍລິສັດຊັ້ນນຳຢູ່ຕ່າງປະເທດ.

ນອກຈາກນີ້ ກຸ່ມບໍລິສັດ ສຸກໃຈ ຍັງມີທຸລະກິດອີກຫຼາຍຂະແໜງການທີ່ປິ່ນອ້ອມ ເຊິ່ງລ້ວນແຕ່ຖືກສ້າງຕັ້ງຂຶ້ນ ໂດຍຍຶດຖືຜົນປະໂຫຍດຂອງປະຊາຊົນ ແລະ ປະເທດຊາດເປັນສິ່ງສຳຄັນ. ທັງໝົດນີ້ ຄືຄວາມມຸ່ງໝັ້ນຂອງ ທ່ານ ນາງ ສິນໃຈ ໄຊຍະລາດ ພ້ອມດ້ວຍຄະນະຜູ້ບໍລິຫານ ແລະ ທີມງານ ກຸ່ມບໍລິສັດ ສຸກໃຈ ທຸກໆທ່ານ ທີ່ຈະດຳເນີນງານດ້ວຍຄວາມໂປ່ງໃສ, ມີຈັນຍາບັນ ແລະ ຖືກຕ້ອງຕາມກົດໝາຍ ເພື່ອຕອບແທນຄືນສູ່ສັງຄົມ, ຄູ່ຮ່ວມງານ, ລູກຄ້າ ແລະ ປະຊາຊົນລາວ ໃຫ້ມີຄຸນນະພາບຊີວິດທີ່ດີ ແລະ ເຕີບໃຫຍ່ຂະຫຍາຍຕົວໄປພ້ອມກັນຢ່າງຍືນຍົງ.